هو واحد من أروع الفنانين المصريين، اتولد في 26 يونيو 1933 في حي الظاهر بالقاهرة. بدأ حبه للفن من وهو صغير، فدخل المعهد العالي للفنون المسرحية واتخرج منه سنة 1957. بعد ما تخرج، اشتغل في مسرح التليفزيون واشتغل كمان مع فرق كبيرة زي فرقة إسماعيل ياسين.
واحدة من الحاجات اللي كانت تميز حسن مصطفى إنه كان بيقلد أصوات المشاهير بطريقة رهيبة، وكان أكتر واحد بيحب يقلده هو الخواجة “بيجو”.
حسن مصطفى قدم حوالي 400 عمل فني، وكان أغلبهم في المسرح، وكان واحد من أبرز نجوم المسرح المصري. من أشهر مسرحياته: “مدرسة المشاغبين”، “العيال كبرت”، “حواء الساعة 12″، “سيدتي الجميلة”. وكل مسرحية من دول كانت علامة في تاريخ المسرح المصري.
أما في التليفزيون، حسن مصطفى شارك في حوالي 90 مسلسل، زي “رأفت الهجان”، “عباس الابيض”، “شيخ العرب همام”، و”يوميات ونيس”، وكان له بصمة كبيرة في الدراما المصرية. وفي السينما، ظهر في أفلام زي “أرض النفاق”، “غريب في بيتي”، “عفريت مراتي”، و”أفواه وأرانب”، وكانت أفلامه مشهورة جدا وحققت نجاح كبير.
أما بالنسبة لحياته الشخصية، حسن مصطفى تزوج من الفنانة ميمي جمال في 1966، وفضلوا مع بعض لحد وفاته في 2015. استمروا مع بعض حوالي 50 سنة، وكانوا بيعيشوا حياة مليانة حب وتفاهم، على الرغم من إنهم مروا بفترة طلاق قصيرة بسبب مشكلة صغيرة، لكن رجعوا لبعض بسرعة. ميمي جمال كانت دايماً بتتحدث عنه بحب شديد، وقالت في برنامج “صاحبة السعادة” إنه كان شخص متدين جدا، وكان بيحج و بيعتمر، وكان بيحب الصلاة وبيحترم شهر رمضان.
أما بناته، نورا ونجلاء وسامية، كانوا دايمًا بيحكوا عنه بحب وإعجاب. نورا قالت إنه كان أب حنون جدا ومنظم في حياته، وكان كل حاجة عنده مرّت بتوقيت مضبوط، حتى إنه كان عنده طريقة معينة لشرب الشاي. أما نجلاء، حكيت إنه كان شخص متدين وكان دايماً بيهتم بتعليمهم التواضع والاحترام.
في آخر لحظات حياته، ميمي جمال كانت معاه في المستشفى، وقال لها: “شيلي إيدك من على خدك، هتحطيها كتير بعد كده”، وبعدها حط دماغه على المخدة وراح. هي فضلت معاه لحد الصبح وتكلم الكرسي اللي كان بيقعد عليه، وافتقدت وجوده جدا بعد وفاته لأنه كان ليه حضور وكاريزما في البيت.
حسن مصطفى ساب وراه إرث كبير من الأعمال الفنية اللي هتفضل في ذاكرة الجمهور لسنين طويلة.
قولولنا ايه اكتر فيلم او مسرحية بتحبوه ليه
وماتنسوش الايك والشير
