*في ذكرى تربال الجمال حميد*

نورا شافت في رؤاها
طيرة تاكل في جناها
وحيطة تتمطى وتفلع
في قفا الزول البناها

لم تمرّ هذه الابيات مرورا عادياً في خاطر والدي عندما سمعها لأول مرة ..قال حينها( إن هذه الصور العبقرية لم ولن تخرج من انسان عادي)..
فكانت تلكم الابيات سبباً لبحث القدال عن حميد والتعرف عليه في مطلع الثمانينات وامتدت بعدها العلاقة بينهما وبين الاسرتين..
حتى أصبح اعتقاد الناس أن القدال شايقي ..
لتواصله الدائم مع أهل حميد حتى بعد رحيل حميد ..وتوادِّهم معنا حتى بعد رحيل الوالد..
ومن جميل الود أن للقدال نخلة باسمه في أرض حميد تؤتي أكلها ولم ينقطع مدها لنا حتى بعد رحيلهما ..

ورغم أنهما علمان في الشعر العامي السوداني ..لم تكن بينهما منافسة قط فلكل منهما مدرسة خاصة به وأسلوب مختلف ..
كان ميلاد (بنينة الشعراء) تكريما لحميد ومحجوب وأزهري
عندما منعت السلطات إقامة ندوة شعرية بمناسبة عودة حميد من الاغتراب ..
فانتفض القدال مغاضبا ومنتصراً لصديقه…

ما منعوني من ريحتك إذا منعوكا
ما كازوكا لو عرفو العنى وعرفوكا
الغنوة البحجروا عليها بالبازوكة
دوب سجّانا فزّ وفرهدت في شروكا

يا بنينة هييي
نحن الكلمة شمس القايلة ما بنلوكا
سن الحق على الظربونى حلق الشوكة
جنياتا بعرفو الغنوة شدوا سلوكا
شالوا الحق نهيض نقزى وضرب دلوكة

يا بنينة هييي

نحن غنانا للولد البشوف قدامو
للبت البتسند حيلو شادة حزامو
ونحن غنانا للبلد البراشى غمامو
نطرى جمايلو حميدو وجميل اياموا

لم أكن أعي فقه الحزن وفلسفته لدى والدي قبل رحيل حميد ..وبعدها محجوب مع حفظ الالقاب والمقامات

فكانت (عصافير حميد ) خير ترجمان لي لذلك الحزن النبيل لفقد صديق لصديقه ..

أقول لها عاد؟
تقوللي:
هو فات؟؟
معاكم .. في ضرا النخلات
يوري الشفع البى هناكا
كيف الشيطنة
ويختاروا حد السيف
يحاحو المويه في المترات
ويعرفوا حورو في بحورو
أقول دا غناكي؟
والا بكاك؟
تقوللي بكيت بكا الغنوات
وغنيت البكا .. وغنيت
وكت نقرشلي طمبورو
سألتها كيف؟
تقوللي:
على القمر عاين
بيسألوا كيف شلع نورو؟؟
أقول لها وين نقاقيرو؟
تصن صنه..
وتشابي على البحر .. يبسان
تقوللي: المهله يا إنسان
جناح واحد يفردو الغيم
ويطويهو الغنا الهفتان
وما بفوت الفضل خيرو
يبتق في صحاريكم
نبوءات الزمان الجاي
ويسقيكم لبن طيرو
أقول لها كيف غناهو هناك؟
تصن تاني .. وتنقر صمتي بالصنه
تقوللي: متل ركوب الخيل
مزامير سابحه للفهمان
مسامير نابحة في غيرو
أقول لها وينها؟ في الجنه؟؟
أقول لها: وينها؟ في الجنَّه؟؟
تقوللي: كَبِد مساديرو
أمِشْ ..
تلقوهو (في طْنَ) الحُب (1)
موحَّد فيهو .. زي مافيش ..
كذا الدرويش
يسَـمِّع للهفيف أنسام
يشوف الهمسة نص الليل
يدقلِش للقلوب دِقْليش
على جيهة الغنا المعدوله
واقف وسطكم معدول
مجرتق بالسلام والخير
كأنو عريس
وقابض جمرتو وراضي
وماسك الدفة للرواويس
ومن حاحاية الرُّعيان
يوريكم
غناويكم
مسراتكم بواكيكم
حكاويكم
وكل ماكان سمح فيكم
مخازيكم .. وليلاً طالْ
بلاويكم
بَشَاتْن الحالْ
وسوطو يدودي في الظلمة
وصوتو ينافِح الطغيان
أقول لها: مال جناحك مالْ؟
دَنَت مِتل الحُزُن في الروح
وبين الهمسه والهمسه
تقوللي اصبر
جروح وتروح
أقول: جُرح الفراق .. يبرا ؟؟؟
تقولي: أريت اكان شُفتو ..
أريت وأريت اكان شُفتو..
بعد ما هَدهَد الأيتامْ
ووزع عمرو للأيامْ
قَرالكم سورة الواجِبْ
تَبَسَّمْ ..
ونَام ..

اللهم ارحمهما واجعلهما أخوان على سرر متقابلين
روضة القدال