*ماقاله الشريف زين العابدين الهندي عن الجزيره*

مطروحة الجبين من سوبا لي سنار
نيليك من غرامهم لبسوك سوار
اكنافك موطأة فيها ماء وخضار
ولي عزاز القبايل صرت احسن دار
**
محصولك دهب مابكيلو بي العبار
مواسمك عدة محسوبات طوال وكتار
ارضك في الجمال محسوبة بي الاشبار
مشكَّلة بي التراب لكن لجين ونضار
**
ترعك زي بحار لبنان طوال وعدال
واب عشرين إفوق ناس بردى في الامثال
لياليك بي القمر رويانه نور وظلال
مطرزة بي النجوم في احتفال وجمال
**
قرآنك بزيم من كنت انتِ بلاد
تقاقيبك تضوي الليل زناد في زناد
ماشقاك ضلال الا انشبح وانحاد
وما حال فيك ظلوم الا انكبح وانقاد
**
عزك من قديم محسوب جدود واحفاد
عمروك الرجال تيلاد قصاد تيلاد
زرعوك بي السلاليك ومنجل الحصاد
جُرنك في التَّقي تمتم قُرافو وزاد
**
مبسوطة ومحكرة لا هبك لا تبوب
وقطنك زي لتيب الحقنة خاتي عيوب
معلاق منتنى ولوزا عفي ومكروب
وتيلتو طويلة زي خيط الحرير في التوب
**
دواوينك مفتحة لي الضيوف مفروشة
وحلالك مجندرة لا وسخ لا كوشه
شاربة الهمبريب بي الساريات مرشوشة
والعجب الاماسي تقول ليالي الروشة
**
في مدني الكبير نشأت لك الحيثية
فجرتِ المواهب ومنبع الوطنية
بذرة مقدسة اتربت على الحرية
من المؤتمر لي الليلة نامية قوية
**
من يومك كسبتِ الكاس وشلتِ الراية
وافكار المحافل باقية ليهم تاية
بي التعليم سقوك وشبعوك قراية
وادوك من شبابهم كل حب ورعاية
**
حليل قلب الجزيرة المستقيد النابض
حليل جمعة رجالها وجيل شبابها الناهض
حليل جمع السراة زي الهزبر الرابض
كل واحد على وطنيتو عاضي وقابض
مع خالص الدعوات أن يعمها الأمن وتعود إلى حضن الوطن وينعم انسانها بالحريه.
رحم الله الشريف زين العابدين فإنه من سلالة تميزت بحب الوطن