*(عودة الخرطوم ).. الفاتح إبراهيم بشير*

(عودة الخرطوم )
باكر صباح الخير يعود
والدنيا تتملئ بالفرح
والضحكة تدخل كل دار
ويشفي القليب الانجرح
الدنيا اصلها امتحان
فيها الرسب وفيها النجح
مهما يطول ليل العذاب
تشرق شموس كل زول نزح
… ….. .. ….
نعم الزمن جهجة خطاك
همك مع الايام كبر
وبيتك بينتو بعد تعب
حافظ مساحتو شبر شبر
واتهدا واتسرق الاثاث
في الهيجة راس مالك ودر
مكتوب مقدر كلو ليك
قوم تاني نبدا من الصفر
…. ….. ….. …….
.
اوعك تقولي مستحيل
وانا تاني مابقدر محال
مالقمرة بحجمها الكبير
دايما بتدي بالهلال
في الدنيا كم قامت حروب
في (روندا) يكيفك المثال
عادت كما كانت وطن
والليلي عنوان للجمال
….. ….. …….
انا وانت والناس العزاز
يلاك حي علي الفلاح
الخطوة تتبارك عشم
لو ماشي في درب النجاح
مهما يدردحك الزمن
اعتبرو في الاخر كفاح
لو حتي عاندك الظرف
كيف المهم بس تبدا صاح
…. ……. …….

ترجعلنا الخرطوم عروس
ولجملة الطيبين سكن
ونتلاقي في العربي العصير
وقلوبنا مليانات شجن
الزحمة والناس والغلات
معروف هلال مريخ غدن
وكمساري يبنح حسو راح
تحلف تقول مضمار هجن
… …….. …….
راجينا شارع النيل نعود
ونضرع مساحتو ركن ركن
ويجيك نسامو العليل
ممزوج دعاش وعطور و بن
ياروعة الخرطوم سلام
والله ماك شبه الحزن
يابت نبلدية ونخيل
وهشابة جم لوزة قطن
(هانت)
الفاتح ابراهيم بشير