*رحيق الأزهرية..محمد الحسن سالم حمّيد*

رحيق الأزهرية
ءءءءءءءءءءءء
نفسي موت يا اتحادي
يا اتحادي أموت يا خيَّ ..
شان تعيش أبداً بلادي
عالي فوق نجم الثريا ..
يا نبي .. الحِس بالمبادي
وسِر رحيق الأزهرية ..
عيش على نور اتحادي
وموت تحِت نار القضية .
ءءءءءء
جاي آخر الليل مهوِّد
بالو كان مشغول شوية ..
مرة بي واقع مسوِّد
زي شوارعنا العشية ..
مرة بالشرخ المدوِّد
ضارب أورنيق القضية ..
جاي آخر الليل .. آخر الليل
بالو كان مشغول شوية ..
ءءءءءء
يفتح الرادي .. الكوارث
ماشة وين الدنيا دية ..
يقفل الرادي .. الهواجس
يا يتاور شوق بنية ..
عيش حياتك وأمسيات
بين صحابك وأم رضية ..
أمنياتا على أمنياتك
انت جنَّك وطنية ..
ءءءءءء
أصلو بس وارث مبادي
ياخ أرِحْ روحك شوية ..
بين وجيعِك يا بلادي
واحتياجات آدمية ..
راح مهوِّم جاي وغادي
يا إلهي يا إلهي العربية ..
خدرة كانت هل هي صدفة
وصدفة شارع المرغنية ..
ءءءءءء
ما برد بس جسمه دفَّى
بي شُخُب دمّو القضية ..
قالت الضفة المَخفَّى
كان بيتلافى المنية ..
لو لفيف اللفو لفّ
دغري مالك يا بُنيَّ ..
ياللي بالحِس والمبادي
وسِر رحيق الأزهرية ..
عاش على طول اتحادي
ومات في شارع المرغنية ..
ءءءءء
مات غمامة سقت بوادي
أو شميشي المغربية ..
كان مدندح بالوسامة
والبساطة السرمدية ..
في ابتسامة كمّن ينادي
من بنات الحي صبية ..
زرّعت منّو المبادئ
خُضرة تشرح بي روية ..
كيف يصير ذات حالة دالّة
زول لحالو هو أغلبية ..
ءءءءءء
محمد الحسن سالم حمّيد

رحم الله الشقيق،، محمد الازهري