*منبر كريمة بدلا من منبر جدة والكاتب الساخر جعفر عباس*

كل السُّلطة للشايقية
تاريخيا عانى أهلي الدناقلة من غارات الشايقية على ديارهم، حتى جاء الأتراك وكسروا شوكتهم في معركة كورتي (4 نوفمبر 1820)، وبحكم مزاملة الكثير من الشايقية في مدرسة البرقيق الوسطى، فقد ربطت حبال ود قوية بيني وبين العديد من بني شايق، وأحببتهم وأحببت ارتباطهم بالأرض، وتسنى لي الطواف بنوري، القرير، مساوي، جلاس، البركل، كريمة، الكاسنجر، الكرو، تنقاسي، مروي وغيرها، وعايشتهم كجيران في كوستي، وصرت أعرف أن الشايقية مستودع جماليات، وأنهم أهل ظرف وبديهة حاضرة وكرم أصيل، ولا يتضايقون من وصفهم بحب المال
أعيد عليكم اليوم طرفة عن امرأة لديها بنت فائقة الجمال توفي والدها، وحددت الام مهر ابنتها ب5 مليار، لا تنقص مليما واحدا. شاب شايقي من تلك المنطقة اغرم بتلك الفتاة، وعمل بهمة حتي جمع 3 مليار واخبر والده برغبته، وشروط أم الفتاة، فقال له الوالد: جيب المبلغ، وتعال معي، وربك يسهل.. وذهبا الي بيت الفتاة.. قال ابو الولد لأم الفتاة: اتمني ان لا تقاطعيني حتى انهي كلامي.. ابني يريد ان يتزوج ابنتك، وهذا مليار مهرها، صاحت الام: ولكن… فقال الرجل: رجاء لا تقاطعيني حتى انهي كلامي.. هذا مليار لك لتكوني زوجة لي، وابتسمت الام وقالت: علي بركة الله، مبارك لنا ولكم.. ولما سألها الجيران كيف التنازل عن المهر المحدد ب 5 مليارات، ردت: سعر الجملة يختلف عن سعر القطاعي، ولما سال الشاب أباه عن المليار الثالث الباقي، قال له الاب: نرضي به أمك
*وإليكم مجددا ما يثبت ان الشايقية مؤهلون لحل الأزمات والتفكير خارج الصندوق*
،
فقبل حين من الزمان صفع شاب الرئيس الفرنسي ايمانويل ماكرون أثناء قيامه بجولة انتخابية، فكان رد فعل ود شقدي:
ضاربو كف في شنو؟! عاد آآ يابا جيت راجع بيتك بعد شمس تقلي الحبة لقيت الكهرباء قاطعي.
نان وقفت في صف العيش ثلاث ساعات.
نان آآبوي جربت تكابس في المواصلات وبعد ده تركب شماعه.
كافتو في شنو… مالك فتحت الماسورة لقيتا قاطعي…. مشيت الصيدلية شايل قروشك لقيت الدواء ما في؟ وقفت في صف البنزين يومين .. كان مو قدنفه منك وقلة أدب.
جيت راجع أهلك مرتك قالتلك أنبوبة الغاز فضت وبقيت تزازي من مكان لي مكان.
والله ياهو الفضل. اكان معانا هنا كنت سويت شنو.؟
والله ياها السمكة الشبعت ومرقت من البحر.. مالك َ؟؟؟ عليك دين من سيد الدكان واللبن وسيد الخدار.؟؟! ياربي فتحت عيونك من الصباح لقيت ولادك الماشين الجامعة والمدارس حارسنك لي حق الفطور والمواصلات. تقول مالك، الملي التاخدك. راجياك ضحيى ولا سمايه؟ والله ياهو الفضل.
حايم من بار لي بار تشرب في البيرة الساقطي ومن ملهي لي ملهي.
يسعلك الله البخليك تكفتو شنو؟
نبذك قالك شذاذ آفاق زي ناسنا؟
ولا قال ليك سنعبر وما عبر؟ العبرة التخنقك.
كافتو مالك؟؟؟ الناقصك شنو؟؟
من الضبان والبعوضه الكرهتك عيشتك
ولا تصبح عليك الواطه تلقي الاسعار زايدي والدولار طاير. تطير عيشتك؟
تاكل في الرغيف الابيض ده ويجي عليك تكفتو . يكفتك الشيطان آآ يابا
*ودا كان قبل الحرب* ودليل على الوعي والفطنة، *وعلينا الآن وضع كامل ثقتنا في أولاد شِقِدِّي، ليحلوا لنا تلال المشاكل التي نعاني منها، فقد جربنا في الحكم أولاد الشرق (عبود) والدناقلة (نميري) والجعليين (البشير والبرهان)*، والآن حان دور أحفاد مهيرة والملك صبير، ويصبح *منبر كريمة هو البديل لمنبر جدة*