*مناشدة عاجلة – ( كهرباء الشمالية ) يا والى الشمالية*

—-

حقيقي أهلنا في الشمالية نحن سامعين وجعهم وشايفين زراعتهم بتموت قدام عيونهم لكن منو يصحى المسؤولين من ثباتهم العميق ..

الزرع مات قدام عيونهم والموية واقفة والبيوت حارة والروح اتسلت سل من الوجع وتجي تسأل الكهرباء وين؟

يقولوا ليك عطل فني ومرة برمجة وقطوعات مبرمجة
والحقيقة دي ما أظن دا حال برمجة دا رٌبما إهمال متكرر لمنطقة فيه كثافة سكانية عالية وفيها نازحيين وفيها زراعة ….

الشمالية ما طالبة مستحيل يا سادة طالبة حق بسيط ( كهرباء تشغّل المواتر وتسقي الزرع وتخلي الزول يقدر يعيش في أرضه عزيز مكرم )

أنا بعتقد ان الزراعة في الشمالية أمن قومي عديل كدا ولمن المزارع يخسر موسمه البلد كلها بتخسر عشان البلد اصلاً فيها ازمة إنتاجية وواقفة عديل وفي عدم توظيف للشباب ولمن الشباب يزهجوا ويهاجروا من الولايات مثلاً زي الشمالية بتصبح ميتة رسمي لا حياة لا شغل لا شباب وبطريقة المسؤولين الملاكلكين ديل السودان بيخسر ناسه واهله …

الكهرباء ما منحة والزرع الروى بعرق اهل الشمالية حرام يموت عطش..

الله غالب لكن ما معناها نسكت ( أنا نصيرة للزراعة والمزارعين ) يبقى معناها نشتغل ونطالب لحد ما يجي اليوم البنقول فيه
الموية جارية والكهرباء شغالة والزرع واقف …

كسرة —

أقيلوا وزير الطاقة

وبس

عائشة الماجدي