*الامين العام للمجلس الاعلى للسلم الاحتماعي نتالينا يعقوب الحرب كشفت الوجوه.. والسلم الاجتماعي هو طريق السودان للنهوض*

الامن العام للسلم الاحتماعي
نتالينا كنونا تهنيء بالمولد النبوي..وتحذر

الامين العام للمجلس الاعلى للسلم الاحتماعي
نتالينا يعقوب الحرب كشفت الوجوه.. والسلم الاجتماعي هو طريق السودان للنهوض

حوار: إنصاف عبدالله

في خضم الاحتفالات بالمولد النبوي الشريف، وفي ظل التحديات التي خلفتها الحرب، كان للمجلس الأعلى للسلم الاجتماعي دور بارز في لمّ الشمل وترسيخ قيم التعايش.
لقاء خاص مع الأستاذة نتالينا يعقوب أبو كنونا الأمين العام للمجلس الأعلى للسلم الاجتماعي، للحديث عن التنوع و التعايش السلمي في البلاد خاصة بعد الحرب التي عصفت بالبلاد واداور المجلس في مرحلة البناء والتعافي
بلغة السلام حاورناها وحاورتنا بكل اريحية:
نتعرف عليك؟
بداية كل التحايا انا نتالين يعقوب الامين العام للمجلس الاعلى للسلم الاجتماعي

نعايش هذه الايام احتفالات البلاد بمولد المصطفى عليه افضل الصلاة والتسليم رسالتكم كمجلس؟
يا سلام في البداية تحية لك و كل للاخوة المسلمين امتياز عظيم ان تكون في بلد فيه احترام للاديان وتعايش. بقول كل سنة وهم طيبين كل سنة طيبين وعيد مولد نبوي شريف يووم عظيم يتولد فيه النبي محمد عليه الصلوات والتسليم.
احنا كمجلس سلمي اجتماعي مجلس مهتم بالتنوع وبالتعايش السلمي. السودان متنوع من جميع القبائل من جميع الاجناس وكمان من جميع الاديان. كون ان انت تكون مسيحي تعبر عن امتنانك تعبر عن حبك للمسلم هذا ان دل يدل على التعايش على الحب.
فاليوم ده بالنسبة لنا عظيم في المجلس الاعلى للسلم الاجتماعي نود نعكس الجانب الايجابي او الجانب الاجتماعي كيف احنا عايشين في السودان نتقبل بعض بكل تفاصيلها. العيد عيد المولد النبوي الشريف بيدل على دلالات كثيرة: احترامنا لبعض حبنا لبعض قبولنا لبعض احترام ثقافاتنا اعيادنا. وفي نفس الوقت بنقدر نقول انه فعلا فيه سلم اجتماعي انه انا اعبر عن حبي لاخوي المسلم وحتى اللاديني وحتى بقية الديانات. نحترمهم لانسانيتهم هم اشخاص لديهم عند فكر معين مفاهيم معينة. ربنا جابنا كلنا مختلفين لهدف.
كل سنة وكل الشعب المسلم بألف خير وعافية.
نجد ان العديد من الطوائف والديانات يقومون بالزيارات في المولد بحكم علاقاتك مع المشائخ والطرق الصوفية حدثينا عن انطباعاتك ومشاهداتك؟
بمحبة شديدة اجابتنا قائلة: ياسلام ياسلام. اذكر منذ تعييني في المجلس كل الضيوف الذين كانوا يزوروننا في المجلس من الطرق الصوفية كنت مبسوطة بيهم جدا. اجد منهم القبول والحب وكنت الاحظ انهم يتقربون مني ليتعرفوا علي اكثر.
ودايما بقول الناس ممكن تسمع كلام عنك او عليك لكن لما تقرب منك تعرف معلومات حقيقية. والمجلس يضم كل الفئات: طرق صوفية رجال الدين نظار مكوك مرأة وحتى على مستوى الدولة. لانه سلم اجتماعي مؤسسة اجتماعية لا يوجد اقصاء لاي كان لان اي زول قادر ان يكمل الاخر وان يرفعه. هيبة المجلس تاتي من تقبل الاخر.
الطرق الصوفية والمولد النبوي الشريف جزء اساسي من اليوم. حاليا القائم عليه النوبة الدراويش كل التفاصيل السمحة: اللون اخضر السكسك الشعر. الكثير منهم تفاصيل سمحة شديدة. جزء اساسي من المجلس او من تركيبة المجلس.
التأسيس والنشأة: المجموعة الصوفية والطرق الصوفية لعبت دور كبير في تأسيس المجلس. وفي نفس الوقت لانه ان دل يدل على حبهم للاخاء للثناء للتفاني ولقبول الاخر وفي نفس الوقت للتعايش.
وكمسيحيين نتداخل مع كل الاجناس. واتذكر دايما في رمضان كنا بيعزمونا في افطار رمضان اصدقاءنا المسلمين. وكمسيحيين عندنا صيام بالطبع لكن نكون معاهم في افراحهم واتراحهم.
ونجد حاليا مناسبة المولد النبوي الشريف اللي احنا محتفلين به اليوم. اكيد احنا كمجلس او انا في شخصيتي لازم امشي ازور لازم امشي اعايد تعبيرا حبا اننا جميعنا عايشين في مجتمع واحد او بقاع واحد اسمه السودان ويجب ان نعبر عن حبنا للاخر للانسان الاخر مثلنا.

كانت هناك محاولات من بعض الجهات الخارجية خلال فترة الحرب تسعى لتشويه سمعة السودان وتوصيف الوضع بوجود صراعات ونزاعات قبلية ودينية؟
اجابتنا بانفعال كبير قائلة: الحرب اثرت في كل الناس في المسيحي وفي المسلم واثرت في البنية التحتية بتاعة السودان ككل وبعدت الناس وفرقت الناس وخلقت العنصرية وجعلت اي شخص يطلع بالتوب بتاع انا احسن من شخص.
وفي ناس اتربوا فينا الحاجات دي. في ناس لقوا مداخل في الكراهية. في ناس لقوا مداخل انه الناس دي ما متعاونين. في ناس لقوا مداخل انه دي المسيحيين ابعدوا.
فالحرب عرفتنا معادن الناس اللي بيقولوا هم بيدعمونا لكن هم ممكن يكونوا اعدائنا. الحرب خلتنا نشوف وجوه الناس الحقيين اذا كان على مستوى الدولة واذا كان على مستوى المواطن او اذا كان على مستوى الدول التي تدعي انها تدعمنا.
شفنا وجوههم الحقيقية انها كانت تريد الحرب انها كانت تنتظر فرصة زي دي ان الناس تتشاكل انه السودان اتخرب ليمررو مصالحهم الشخصية واجندتهم الشخصية.
بصور الشعب السوداني لما وعى ليها ما كان متخيل حاجات كده.
فاعتقد بقدر التشوهات اللي حصلت الحرب دي عملتها بقدر الخراب بقدر التبار بقدر كل شي.
لكن شايفة انه لو الشعب السوداني كله اتكاتف ما في زول حيقدر عليه. الحاجة الحصلت حاليا الشعب السوداني كله رجع من خلال الاحتفالات من خلال المهرجانات من خلال اللقاءات ونجد ان هناك حالات تعافي وتشافي.
دي واحدة من الحاجات ده رد للعدو اللي يكسرك او اللي يدمرك او اللي عاوز يشوفك انت كشعب سوداني انت تحت. لكن نجاحك بشفاءك قومك كان من اول وجديد بناءك لبيتك وشوارعك من قلبة يقول ان العدو ده ما حيقدر عليك مهما حاول مهما بيكونوا طرق ما بيقدر.
برضو الحرب دي خلت الناس في القيادات العليا يكتشفوا قدر كيف انه ما اي زول بيجي بصرف بريك او ما اي زول بيجي بيقعد معاك في كرسي او ما اي زول بيوقع معاك ورق انو زول كويس.
لا الناس دي في حاجة في السودان عجبتهم في حاجة في السودان شقتهم في حاجة في السودان حسوا ان هم لازم يقربوا لك عشان يستفيدوا منك.
عشان كده انا بقول انك انت لو عاوز تعالج قضايا السودان عالجها بالسودانيين انفسهم. عالجها بالشعب السوداني. اقعد معاهم لكن ما تتوقع ومستحيل وانا بقولها بالفم المليان مستحيل تجيب زول غريب يحل لك مشكلة بلدك.
وكمثال في البيت الصغير انت ما بتجيب القاضي يجي يحل لك مشكلتك لا انت بتقعدو الاخوان الاخوة الام الاب بتحلوا مشاكلكم. مجرد ما يخش طرف تالت النزاع حيكبر.
الحرب دي عرفتنا معادن الناس اللي بيقولوا بيدعمونا لا ما بيدعمونا بالعكس هم عاوزين بيشوفونا تحت عشان لما ينتصروا يقولوا احنا انتصرنا عشان واحد اتنين تلاتة.
اذا هي دعوة للحوار السوداني السوداني عبر بوابة السلم المجتمعي. دعوة كريمة ودعوة جميلة.
لانسانيته.
مما تحذرين؟
ما نثق في الكلام الحلو وانما نثق في الافعال. ما نثق في اللي بيقرب ليك عشان يساعدنا لكن نثق في اللي بيحذرك انه ما نمشي نقع في الحفرة دي.
ما نثق في الشعارات والادعاءات وانما نثق بفعل حقيقي شايفينه الزول بيعمله. ما نثق في الدول اللي بتجينا بالاكل والشراب وانما نثق في الزول البيجيب لنا قلم وكتاب وبناء مش فكر.
ما نثق في زول بيدعمنا بقروش لكن نثق في زول بيجيب لنا طوب وبيجيب لنا رملة وبيجيب لنا اسمنت عشان يبني معانا بلدنا.
ما نثق في انسان لابس كويس وجاي ينزل للناس اللي ما لابسة كويس يتناقش معاهم. بالعكس نثق في زول ينزل لنا تحت وبيتناقش معانا تحت عشان نمشي قدام.
كلمة اخيرة؟
لايوجد شي بضم و بوحد السودان غير السودانيين انفسهم. ما في شي قادر يعبر بالسودان لقدام الا السلم اجتماعي او تعايش سلمي او قبول الاخر او نجابه خطاب الكراهية.
لما نقول عايزين نمشي قدام خلوها ما تكون شعارات عشان تكون افعال. والفعل حصل من خلال المؤسسة حقتنا المجلس العالمي للسلم الاجتماعي قدرنا نشوف تغيير ولو تغيير بسيط. تغييرات ملموسة الشعب السوداني قادر يحسها.
واكبر دليل انه الناس بقت تعرف انه السودان فيها استشفاء فيها رجوع فيها حياة. فخلينا خلونا نقبل بعض ونحب بعض ونحترم الانسان