.*مرافئ الحنين..جديد الشاعر الشاب وليد كردي*

​عِرفنا الحظ يعاكس الناس
مره تضيق ومره تهون
يحندك في هوانا الريد..
يزيد الشك ويبني ظنون
…..
تعبنا من الوقوف في الباب..
نراقب في نجم مسجون
نساهر والعيون ترجى..
نجوم الليل يجيها جنون
…..
يا ستو القدر مرسوم..
ولا بتنفع معاهو حصون
مقدر لينا نمشي دروب..
ولو شوك الطريق مسنون
…..
عشمنا الفيكِ ما هبّاب
ولا ريشة رسمنا فنون
محبة مكانا في الوجدان
محل روح العِشق ما تكون
…..
صبرنا على سنينا عِجاف
شرابنا العلقم المـحقون
لكن في العزيمة رجال
قلبنا مع اليقين مسكون
…..
أريتو تدوم حبال الود
مع قلبك تبين لي شجون
وتجمعنا الظروف يوماتى..
جهرة وريدنا يبقى مصون
…
حلاتك يا حبيبة الروح..
يا دُر في البحر مكنون
جمالك شال عقول الناس
وحير أي زول في الكون
…..
غرسنا الريدة في الوديان..
سقينا الحب دمع مخزون
عشان تطلع جناينك ريد
ونقدر لي عهودنا نصون
…..
ستو الغربة ما بتدوم..
ولو طال الحبس والهون
بجينا اليوم يفيض النيل..
ونطرد همنا الـمدفون