⭕️( هدنة ) ✍️الطيب عبدالماجد
🎻( التربادور ) ( عوض جبريل )
✨️فيلسوف الشوارع وحكيم الغلابة
( وكفاك ما تبكي يا عيوني ) …!!😥
✍️سأكتب عنك بقلم الشعب ومداد البسطاء وحبر الشجّن
وقد كنت كبيراً ….!!
( عوض جبريل ) كتب كل شيئ وهو ( مُعلق ) بين سندالة ( المُعلم ) وقدَح ( المونة ) …
فقد كان ( عامل بناء ) شريف يأكل من عرق (جبينه ) وشاعر غناء ( حريف ) يكتب من عرق ( حنينه )
فقدم باقات ملونة لايعرف الكثيرون أنها له
ويبني طوبة حب ويرمي ( مونة ) محنّة
( أي فنان غنى ليهو ) وقد كتب لروحه …فخاطب أرواحنا
وفي المسافة بين ( عجنة ) الإسمنت ومناولته
قال ( عوض ( كل شيئ ) ..
وبنى ( إمبراطوريته ) الشعرية التي توجته دون مراسم
فكان ( عوض جبريل ) شاعر الربيع وكل المواسم
لم تنصفه ( الدنيا ) وظلمته الأيام ..
عدسات ( الميديا ) وبريق العواصم
وكفاك ماتبكي يا عيوني
أتاريهم نسو الريده و نسوها حتي نسوني
وهذه لايكتبها إلا رقيق ….. !!
يا رقيق …
تدفق ( عوض جبريل ) في هذه الأغنية الزاهية والتي تكشف عن شاعريته الجزلى ومشاعره السياله ورقة الشعور …
🎻
و الساب الحنان فكي و حقيقه الريده بتبّكي
🎶
( لقد تدفقت يارجل …وارتقيت )
وقد تبادلها ( ترباس ) بالأصالة و( الحوت ) بالوكاله
( كمال ) قَعَدا و ( محمود ) سكب فيها من روحه فسالت ..
و ( الجان ) الفنان الوحيد الذي إذا تغني لغيره
تشعر أن الأغنية كُتبت لإثنين ….
وقد يتجاوز الاصل …وترباس ( مُعلم )
🎶
سابك و ما حصل سبتي ….
وكفاك ما تبكي ياعيوني
( عوض جبريل ) ذلكم الهائم على وجهه في الطرقات وبين الحواري يستلهم كلماته من عيون الناس وحرارة الأزِقة ….!!
تراب الشوارع وريحة البيوت ….!!
والقصيدة عند ( عوض ) ومضة ….
وعباره أو إشارة لافته يستلهمها الموهوب
وهو يتنقل في شوارع المدينة ( راجلاً ) يلتقط الأنفاس ويحيلها شعراً فتجري بحور وترتقي غمام
🎶
( وطبيعة الدنيا زي الموج تشيل وتودي ماتهتمو للأيام)
أشهد يا ( جبريل ) أنك في هذه الأغنية تقول حكمة
وتهدينا زهور
( ترباس ) وداها محل ( عاوز ) وعوض ( قال )
فنزلت على المتلقي سكينة وسلوى ..وما تهتموا للأيام ظروف بتعدي
أغنيه بلا تاريخ إنتهاء صلاحية ولا تسقط بالتقادم
تُسقِطها على نفسك والحال …كيفما شئت …وأينما شئت ..وكلما شئت …
حين تشتد المحن وتتبدل الأحوال…
تضربنا ( الزايلة ) وتخونا الظروف
ومصير الزول حياتو ياما فيها يشوف
وفى دنيانا بنلاقى الفرح والخوف
( جيب من جوه يا كبير )
ليلخص ( عامل البناء )المغمور الدنيا ويحكي كل الحكايه ….
بكلمات من ذهب وحروفٍ من نور
وجمال الدنيا فى بسمة سرور وجمال
وفى فرح الخواطر الطيبة فى الآمال
وفى شروق الصباح فى بسمة الأطفال
ومهما تظلم الأيام ضياها الفال
غناها ( ترباس ) لنزلاء السجون في يوم ترفيهي
قال مدير السجن يومها إن المساجين بدوا وكأنه قد
جاءهم إفراج لفرط فرحتهم
فقد منحهم ( جبريل ) أملاً جديد ونظره للحياة
من زاويه ( منفرجه ) ….
واجمل أغنيات ( ترباس ) كتبها ( عوض جبريل ) وسيبني في عز الجمر وإنت من حولي بتمر …
وإنت عارف ..!!
كانت إحدي الباحثات الاجتماعيات تزوره باستمرار وفجأة غابت ..
قال ليها
بي قليبك تقول لي تعال وتعال وبي عيونك تقول لي لا …مافي مجال …
( عوض جبريل قافل على ( بت الديناري ) والكرِت محروق ) ♦️😂
ناس ( عوض ) ديل ما ( تهظر ) معاهم …بنقلوك ( لايف ) …
والشِعر عندو ونسه …تقبل التلحين
والقِسمة على ( الحنين )
مره كان جاي من الشُغل ( مغبر ) وحالتو حال
صادف إحدى الحِسان …
سلم عليها فتجاوزته ولم ترد التحيه ..
قال ليها
ﺍﻟﺠﻤﻴﻞ ﺍﻟﺴﺎﺩﺓ
ﻭﺿﺎﺡ ﺍﻟﻤُحيا
إلتفت ﻳﻮﻡ ﺷﻔﺘﻮ …..ﻣﺎﻗﺒﻼﻥ ﺗﺤﻴﺔ
ﻣﻦ ﺩﻻﻟﻮ ﻭﻻ ﻣﺎﻟﻮ …
غناها ( عركي ) …
( السودان كلو سلَم على عوض ) 🙌
وعركي ما بغني لي أي زول
( البت مسكينه ما عارفه السلَم عليها دا منو ) ؟؟؟
( وعوض جبريل لأي زول ) …
ومن دلالو ولا مالو …!!
ليتوقف ( عركي ) من جديد في محطة العوض
في لقاء سوداني خالص …
وشفت التوب وما لاقانى أجمل منو
وبس التوب!!؟؟؟
شوفو التوب وسيد التوب يكون كيفنو …$!
( والجواب باين من ( ألوانو )
زول بغني ليهو ) عركي ) دا معناها … ( مُصنف )
عاصر ( عوض جبريل ) عدة أجيال
لاقى ( فاطمة الحاج ) في أكثر من مناسبه
ولي حبيب شاغل بالي دايماً مُحطِم آمالي
ولي حبيب محروم منو ولي زمن بسأل عنو
أغنيه تداعب آذاننا حتى الآن و ( فاطمة الحاج )
( فلتة ) غنائية قد لا تتكرر ..لكنها كانت بلا
( تيك توك ) و ( انستغرام )
واستحق صدك لأني حبيتك…
غنتها في لقاء آخر مع جبريل وكان كبيراً وحافل
ومهما عذابى يزيد والعذاب ساهل
مهما عذولي يقول برضي أستاهل
قول ليا ماذنبي غير إني حبيتك
حبيبي حبيتك سميري حاااابيتك 💓
ياخ ( عوض جبريل ) كتب كل ما سألت عليك صدوني حراسك …🎻
أغنيه سودانيه كبيرة وعوض تجلى
( ردوا الجواب قاسي مع إني من ناسك ..
شوف الزول دا بكتب كيف ..!!🥰
حيث لاتوجد أي مرجعيه ثقافيه ضخمة ولا إرث معرفي يُسعِف …
فهومشغول في لقمة عيشه ومشاغل الدنيا
ولكن هناك كتابة عبقريه وموهبة ندية
وكثير تجليات …
ويا قاسي يا اااا قاااسي هل يرضي ما قالوا
ام إنت ما هاميك ولا حرّك إحساسك ….
( غايتو جنس تضِم )
عوض جبريل ( تربادور ) الغناء السوداني بلا منازع
تكمن عبقريته في أنه يستلهم كلمات عادية متداوله
لكنه يحولها الي أشعار ساحرة وأغنيات كبيرة
فكان بسيط وعميق ومدهش ..
لذلك كان ( الحوت ) يغني كثيراً من من أغنياته
( فالأرواح تراقص ما يشبهها )
وبقيت ما زي زمان …
هنا يتفوق ( عوض جبريل ) علينا وعلى نفسه وعلى
القوافي
في أغنيه معطونة مشاعر وغرقانة جمال
و ( محمود ) تمطى وتشظى وتجلى في أداء اسطوري …وعبور شديد
غناها محمد احمد عوض لكن ( الحوت ) أدخلها الألفية وامتلكها بوضع ( القلب )
والريده بين الناس صلة 💕
واسعدنا حبك ياجميل
بقينا فيهو زمن طويل
أريتل أيامنا القبيل
ترجع تنوم العين قليل
ياليل تملى الروح كفا
( محمود مشى فوق واستخدم الرباعي )
ويواصل ( السفاح ) .. 🥰
ليه انت سِبتا المعرفا
علمتنا الحب والوفا
من نار جفاك
ياجميل كفا ✋
عوض بالغ …والجان تسلطن
وإنا لمفتونون
وماكنت بتزورنا وتدورنا وتسعدنا يا أمل الزمان
( الله حي )
والدنيا حب ومواصلة 💕
هذه اغنيه من كوكب اخر ….!!
وريدتنا ألحق حصلا
( كتمت )
…
ليستظل محمود في واحة عوض جبريل
من جديد
وسبب الريد..�عينيك وعينيا..�هم الجارو عليك..�وعليا..
غناها محمود على الحاج وهو معتق وفنان
والجان ( جان ) بلحن واقص واداء عالي
واشتاق ليك واتدفق ريدة
ومن عينيك أخاف تهديدا
لي آمال وأماني بعيدة
وليك في قلبي محبة شديدة
هم الجارو عليك وعليا
هذا ما بعرف بالتحاوز والعبور ومحمود كالعادة عدى بهناك وفات ..
�وسبب الريد ..عينيك فتاكا..�وترمي الزول ..مجبور في شباكا..
لي عينيك عيني وروني
وديمه علي رامياني عيوني
💃
( فحكموا علينا بالحب رمياً بالإحساس )
الم أقل لكم أن ( عوض جبريل ) عبقري …
هو لو ما عبقري بكتب الأيام سجية ومابنقدر نغير
محسوبات علينا المُرة وهنية ..
لا …
( شوف ( لا ) دي …
عمر العام تملي يبتدي بالدقيقة
نبدا السكة خطوة مهما طال طريقا
مهما الشك تجمع من حول الحقيقة
ولازم تبدو ظاهرة للعينين جلية …
( دا تشخيص عالِم )
القمري بطبايعو دايما يبني عشو
ليه الناس تملي بتحاول تنشو
والفي قلبو ريدة احلامو بتغشو
والريدة الاكيدة تفضل هيا هيا
( والفي قلبو ريدة احلامو بتغشو ..؟؟
( لازلنا ننتظر تفسير كيف حدث هذا ) !!؟ 🤔
ومن وين جبت الكلام دا يا عوض ..؟
دا كلام فلسفي عميق وسبحان من اعطاك ووهبك
وما شفتو عوض يا ساري الليل ….!!
لاقى ( الحنين ) الجابري في شوال سكر
الجابري ( رقّصا ) حتى تذوقنا حلاوته …
وارجع لي تاني وعيد لي الاماني
واضمك ب حناني وأشيلك فوق عيني
أسمر يا اسمر باااااا اسمر
اسمر وسكر 💃💃
وجاب السكرية كلها في حبيبتي بستلطفا وما داير زول يعرفا
الغريبة انو كانت مكتوبه ( حبيببتي بت مصطفي ) 😂
ناس عوض جبريل ديل شفافية مطلقة مايعرفو
يكضبو ( سمى بت الهارت ) ♥️
الجابري ( دسا ) الإسم شفناها ( رسِم )
وآسراني بي رقّتا بحديثا في بسمتا
أتمى أنا لي متي تغمرني بمحبتا
وحبيتي بستلطفا 💃
نحن ذاتنا استلطفناها☺️
ياخ دا كتب الحنين البي ..ليه ما قدرو..�العمر من وين بشترو ..
من أين لك بهذا الدفق يارجل …؟
لاشك عندي
أن ( عوض جبريل ) يتردد على وادي عبقر ….
وناس ( الحوت ) أصلًا مقيلين هناك
�ويا وليف الشوق ..�بقيت فاقد الوليف..�والعمر من وين يشترو..
الاغنيه ل ( عبد الله محمد ) لكن ( محمود ) كالعادة
وداها بهناك ونقلها ( ديجتال )
الحوت مرات بعزِل درر كدا
( بي حقو وما يختار في الاتنين بفتح نار )
عوض جبريل كتب ( مع السلامة )
لمحمد أحمد عوض ..المشكلة إنو لحّنا كمان كما
لحّن كثير من أغنياته ومعظم اغانيهو لي ترباس
قالو كان بدق الطربيزة كدا ويلحن ما يكتب
وشدة ما فايض لحن لآخرين…
عوض جبريل لحن
( غدر الزمن )
وشغل القليب بالشوق على زولاً بحِن
طبع الفراق الجوة إحساسي الدفين
صورة شجن زاد الألم سبب الفراق
البينا كان غدر الزمن
( ودا لحن مجنون )
كتبتا الشاعرة سمرقندية محمد المجتبى
المجتبى غناها عبد الله محمد ودتو ليقيل تاني
و( الحوت ) عذبا عذاب
وغدر الزمن
مسح الأحاسيس النبيلة وبدلا
عشرة سنين منسوخة بي أحرف وفاء
ما أجملا
عزاي حروف بعد الشقا
مسح الليالي وحولا
( سمرقندية ) كتبت أغنيه أصعب من إسمها
لو اكتفت بها لأصابت ….وبناتنا كان فامن صعبات
وجبريل منحها لحناً يليق
وكان لقاءه مع ( محمد أحمد عوض ) باذخاً وكبيرا ومبين …
لقاء الأرض والطين …
فبين ( محمد احمد عوض ) و ( عوض جبريل
الموهبة المذهلة ..سحر الغلابة وتفوق البسطاء
نبوغ الزول العادي عندما يخرج عن العادي
يثير إهتمام ( النُخب ) ويهز قلاع الكُل
🎶🎶
و أطري الحنان المني ليك
ساعة شقا و ساعة صفا
على أي حال
إن شــــــا الله ما آخر وداع
عشم اللقاء بيك ما إنقطع لو مستطاع
أصلو الحياة بين الأمل و الشوق صراع
لكني زورق حبي ليك يا غالية ما داير شراع
مع السلامة
،،،،،
( وأصلو الحياة بين الأمل و الشوق صراع )
( تاني شخّص وكتب روشته الزول دا )
مع السلامة انت يا ( عوض ) ياخ فقد خرجت من بين الناس بسيطاً وعفيفاً وزول عادي لكن إحساسك
ماعادي
( عوض جبريل ( صوت الطبيعة وقلم الناس
عُمق المفردة ورقة الإحساس..
زول مننا وفينا …مسكون بالشعور موهوب بالفطرة
متدفق بالعطاء …
الناس الفوق ديل كلهم غنو ليهو
عاش فقيراً ومات فقيراً لكنه فاحش الثراء في العطاء …
وشاعريه عبقريه تشع نوراً وتسطع ضياء
في دنيا لا يملكها من يملكها أغني أهليها سادتها الفقراء
وعلي أي حال …!!
الطيب عبدالماجد
