.
يا المسافر في سرابك
انكشف للناس ستارك
ما تفتش تاني لينا
ولا تدق بالمرة بابك
اصلو بيك وبلاك جينا
هسه كبّل ليك رقابك
.
ياما شلتك في عيوني
وفي ضلوعي سكنتَ نيل
وياما هدهد لي شجوني
طيفك العابر مقيل
كنت قايلك بكرة صوني
وقلبي ما بيرضى البديل
جيتني تنضح بالخيانة
ودمعك الباهت يسيل
هسه ضِعت مع خُطاك
وعتمت الليل في مسارك
.
ما تحاول تروي زهرة
فارقت غصن الحنان
وما تفتش فيني بكرة
عن ملامح زول زمان
الكرامة الفيني صخرة
ما بيهزها زول جبان
كنت راجي الفرحة مرة
وكنت راجيك بالأمان
بس لقيت الغدر طبعك
والجفا الكان باختيارك
.
أنسى إني في يوم عرفتك
وأنسى إنو الريد جمعنا
لو لمحتك.. ما لمحتك
قصة ما بتدينا معنى
في دروب التيه تركتك
والعذاب المر وجعنا
لو ندمته.. أو ما ندمته
انتهى العهد اللي كان
روح وخليك لي ظروفك
وضوي في الغربة انبهارك
