*عام على رحيل سلطان الطرب الفنان محمد ميرغني*

.

كتب المرهف الطيب عبدالماجد
عن ملك التطريب وسامر الإحساس ( محمد ميرغني )
.
( محمد ميرغني ) إسم ذاتو بديك إحساس كدا بي ناس الحلة والحبان والأهل القراب …🥰
يندس في الدواخل كما تسلل صوته الطروب للوجدان السوداني واتحكر …..!!
عشان كدا ( محمد ميرغني ) كان ولا يزال فنان الناس والبيوت والعواطف ….!!
وإنسان مليح وناس …🙏
تسمعو كدا لما مزاجك يستعدل ….وتحس بيهو بغني ليك إنت براك بالإسم…وهذا لايفعلها إلا الكبار ….
ولد في ( أم درمان ) وعاش في ( بحري )
شال من ديك ( سحرها )ومن دي ( حميميتا )
و ( الختمية ) في النص
( ومابنغيب عن بعض أبداً ..
زى أعز اتنين حبايب..) 💞
فسكب من روحه ( الهائمة ) في السودان ( الفسيح ) صوتاً وشجن
وأنا والأشوق …
( محمد ميرغني ) ما بغني بي صوتو بغني بي إحساسو لذلك وصل ……!!
ونحن فرشنا السكة ورود …!!🌹
التقى مع ( السر دوليب ) في ( مين فكّرك ياحبيب ) و ( لو قِدرتْ تغيب ) ليستدير ( دوليب )من جديد وهو يحمل لنا واحدة من أكثر روائعه إشراقًا ….عبر كلمات ملائكية ساحرة…وبوح إنساني نبيل .في واحدة من ( أزهى )الأغنيات السودانية …..
وأنا والأشـــواق فى بـُعــدك
بـقـيـنا أكـتــر من قـرايـب
تجلى ( البروف ) وسكب ( ود ابنعوف ) من روحه فيها
فكانت أغنية بطعم الشهد ومذاق ( الخِفة )
🎼
وكنت فاكر الشوق يغيب..
لحظه واحده عن فؤادى..
عمل محمد ميرغني مدرساً ومربياً في المدارس
ونورساً ومغرداً في المسارح
وفي الاتنين ( معلم ) ….!!
وفي الحالتين بنقيف …🙌
يأخذك صوته الي أماكن أخرى ويحلق بك في عوالم
خفية ….بهبش روحك وبشاغل الجواك ….
تلقى نفسك من غير ما تشعر محلق في حتات بعيدة …وتايه في الفضاءات
والجاني منك ومن تباريح الهوى وصفو بصعب يا جميل🎼
عشان كدا إذا تعثرت إحداهن ( ووحلت ) في ( قيف ) الغرام
💔طوالي بتجري ليهو وبراها كدا تشغل ( محمد ميرغني)
علها تجد ظلاً ومأوى..🙌
بقول ليها …💔
( والحب طريق محفوف صعاب
وإنت لسه فى أولو
ما قلنا ليك الحب طريق قاسى
و صعيب من أولو
ما رضيت كلااامنا و جيت برااك
أهو دا العذاب اتحملو….!!😥
( براحة يا أستاذ )
ولأنه رقيق ….!! يعود من جديد مطبطباً ومؤانساً ورفيق ويحلق بها وبنا …!! …
🎶🎶
ويبقي اسمك هو الغنا .. 🥰
وهو البخفف لي عذابات الضنى
والشفتو منك يا منى الروح يا أنا …..💞
وصفو بصعب يا جميل 🎼….
( جميل إنت دا والله ) 👏
💞
وعشان خاطرنا
خلى عيونك الحلوات تخاطرنا
و لما تمرى ……
أبقي اقيفى و أسألي عن مشااعرنا….
عشان خاطر 🙏
( شوف الجمال دا ) 😍
دي كتبا ( الزورق ) مصطفى سند …ومصطفى سند
عندما يكتب عن ( البحر ) ( تقرب تشرب منو )
لفرط حلاوته ورقته والعذوبه …ودونكم ديوانه
المعتق ( البحر القديم )
فكان طبيعي ان ينهل محمد ميرغني من ( دنه ) ..
🙏
وزمان غنينا لعينيك أغاني تحنن القاسين
هدينالك معزتنا ومشينا وراك سنين و سنين
بنينالك قصور بالشوق فرشنا دروبأ بالياسمين
وقلنا عساك تزورينا ترشى البهجة فى ساحاتا
بي عينيك تضويها …!!😍
( إنا لله ياخ )
مصطفى سند دا لو حضر الحرب دي كان مات مرتين …😥عليه رحمة الله
ومحمد ميرغني ملاها إحساس حتى ( طارت )…!🙌
🥰
ووحاتك تانى لــــم تفــوتــى أبقي
اقيفى سالمى الناس وحيينا
جهرتى الدنيا يا غربتنا ياروعتنا
ما همـاك جــهـرتينا
غايتو (سند ) و ( محمد ميرغني ) ديل لما بتلاقو حقو يكتبو قدامن
( ممنوع الاقتراب لذوي القلوب الضعيفة) 🤚….
( بتقيف) 💞
تابعنا مرافعات ( محمد ميرغني ) الرصينة عن الفن الجاد ..وأنصتنا لدفاعه المستميت عن شرف الكلمة والغناء الذي يهذب الروح ويرتقي بالوجدان …!!
وتحذيراته المتكرره من ( تسونامي ) الهبوط
حتى تعثرت الأغنية السودانيه في مستنقع ( الزنق) …
ومارست الهبوط ( القاتم )و( كتمت ) ….!!
وكنت أظنها لا ( تكتمو ) 😥
وحنيني إليك وليل الغربة أضناني
وطيف ذكراك بدمع القلب أبكاني

كتبها ( ساخر ) ( أغاني وأغاني ) 🎶 ( المعتق ) السر قدور
وكلماتها قد تبدو للبعض أنها لا تشبه شخصيته ( الصاخبة ) …
لكن إذا دققت النظر في عينيه وهو يمارس الاستماع في ذات البرنامج …لعرفت أنها له ..
فقدور ساحر ومسحور …!! ومحمد ميرغني ساقا بي شارع
( الهوى ) 🥰🥰🥰
وأقول ياريت زماني الفات يعود تاني
وألقاك ياحبيب عمري وتلقاني
تلقي الريد معايا لحظة مانسيتك ولانساني
ومابنساك ومابقدر ولاعايز بعد حبك أحب تاني
🎶🎶
( ما بنساك ..وما بقدر …ولا عايز ) ….
( مروق شديد يا قدور) 🙌
( هايييل )
( محمد ميرغني ) الهلالابي الوحيد الذي يطرب له أهل المريخ ….
والإتنين بشوفوهو ( جمال )
كان النجمة ولا هلال
وإنت بدر السما 🌙في علاك ونجمة ✨ في خد السما
وكلاهما فوق ..!!
سألوه مره …قالو لي …
إذا لم تكن مطرب ماذا كنت تتمني أن تكون …؟!
فاجاب دون تردد …..!!
( مزارع ) …!!
نبشرك يا ( ود أبنعوف ) فقد تحققت الرغبتان معاً
فأنت مطرب زرع فينا الأمل وخضرة المشاعر ووريف الإحساس والزهور
أوا لم تغني
🌸🪷
شذي الياسمين وجمال الفل ونضار الآس
منك ياجميل طالبين إيناس ….
ورحيق أنفاس
أهدينا حروف …حيي أو طوف
واعمل معروف …..!!🎼🎼

( شفتا كيف ) …😍

في البي بي سي عربي ….لما يجيبوهو بقدمو بي (ملك التطريب )
تقول لي ( سباعي ) ( وخماسي ) …!🎶

( محمد ميرغني ) دا لما يغني ….يرتقي بإحساسه إلى الأعلى ويحلق بجناحي سحابة …ويسكب من روحه الشجية في خزان الوقود …
فينطلق ( النفاثة ) ويأخذنا معه في رحلة بلا حدود
نحو القمر .. 🥰

وﺷﻔﺘﻚ ﻭﺍﺑﺘﻬﺠﺖ ﻭﻳﻦ ﻳﺎ ﻏﺎﻟﻲ إنتا 😍

لما يغني محمد لا تمتلك إلا أن تهتز طرباً …فهو
يستهدف الشعور ويجري جراحة القلب المفتوح
ببراعة يحسد عليها ويملأه ورداً وحب ..!!
ويقفل على كدا ….💞

لكنى رغم البين رغم الفراق الطال
كانت مشاعرى تقول أبداً فراقنا محال 💞
🎶
( غنا بداوي ) 🙏

( محمد ميرغني ) فنان باذخ ورقم كبير بين الكبار
أسهم في تشكيل الوجدان السوداني …
أحبه الناس وعشقه الشعب ….وضمتنا جلسة ريد💕

وحبك للناس خلاني أحبك تاني ☺️
والسودانيين ديل لما يحبوك …بحبوك بصدق
و بطريقتم الخاصة
يبادلوك الابتسامة…ويحملون لك التقدير ..ويختوك في السما دا ….
حبهم صادق …وودود …..🥰
إلا البلد عيانة 😥

فخلينا نحبك حب شعبى ونحتفل بيك كأمة …
زي ( محمد ميرغني ) دا مفروض كان يسمو شارع بي إسمو
( شارع محمد ميرغني ) في الطريق المؤدي للختمية بحري حيث يقيم ….!!
وتمنحه الشعور بقيمته الحقيقية …وتقدر ما قدمه
للبلد والناس …!!
وبشكي ليكم يا مظاليم الهوى……. أصلي مجروح مرتين 💔