*تعالوا نعرف مع بعض مين هى الفنانة أمينة رزق*

.

هى واحدة من أعظم و أهم وأشهر نجمات السينما المصرية، اتولدت في طنطا يوم 15 أبريل 1910، وبدأت رحلتها في عالم الفن وهي لسه صغيرة جدًا. اسمها ارتبط بدور الأم في السينما، هى أكتر واحدة قدرت تقدم الشخصية دي بإتقان كبير، لكن رغم كده، عمرها ما اتجوزت وما عاشتش تجربة الأمومة الحقيقية، و لقبت بعذراء السينما المصرية و راهبة المسرح المصرى

ليه أمينة رزق ما اتجوزتش بقى ؟

في لقاء مع الإعلامي مفيد فوزي، أمينة رزق قالت بصراحة إنها مجوزتش لسببين
الأول انها كانت عندها “عقدة نفسية” من الرجالة ومن الحب بسبب شغلها في المسرح وتجارب صديقاتها اللي شافتها حوالينها. وقالت:

“كنت بشوف الست دايمًا بتعاني وبتتذل في الحب، وأنا طول عمري حاسة بكرامتي ومبحبش الذل.”

ووضحت إنها لما كانت تحس بأي مشاعر تجاه حد، كانت على طول تهرب:
“جاتلي عقدة نفسية من الحب والرجالة.. لما كنت أحس قلبي بيتحرك كنت أهرب فورًا.”

كمان قالت إنها اتخطبت أكتر من مرة بس ولا مرة الموضوع كمل
“اتكتب كتابي مرة واحدة بسبب ضغط أهلي، بس مقدرتش أكمل الجوازة.”

اما بقى السبب التاني اللى خلاها ما تتجوزش هو تعلقها الشديد بوالدتها. أمينة رزق حكت إنها ما كانتش عايزة أي حاجة في حياتها تأثر على علاقتها بأمها، وقالت:
“زي ما هي ما رضيتش تتجوز علشاني، أنا كمان ما أتجوزش علشان نعيش لبعض وما أجيبلهاش واحد يسمها ولو بكلمة واحدة.”

أمينة رزق بدأت حياتها الفنية من وهي طفلة، لما اشتغلت منشدة مع فرقة علي الكسار، وبعدها انضمت لفرقة يوسف وهبي سنة 1924. أول فيلم ليها كان “قبلة في الصحراء” سنة 1928، وحققت نجاح كبير بعد كده. و عملت أفلام تعتبر علامات فى تاريخ السينما المصرية زى :

دعاء الكروان
بداية ونهاية
قنديل أم هاشم
العار
المولد

اما فى في المسرح فالمسرحيات اللى شاركت فيها مهمه جدا زى :
الحسين ثائرًا ..
إنها حقًا عائلة محترمة (مع فؤاد المهندس وشويكار) و اللى عملت فيه دور كوميدى و هو حمات أوسة اللى بتفضل لابسه اسود و متقمطه و فجأة لما بتقابل حب عمرها بسيونى ابو الليف بيييسو .. بتلبس باروكة صفراء و هو يلبس باروكة تدارى صلعته ..

اما بقى فى التلفزيون والإذاعة فقدمت مسلسلات زي:

أحلام الفتى الطائر
بوابة المتولي
الأيام

هى متلقبتش بـ “راهبة المسرح” و”عذراء السينما المصرية” من فراغ ، أمينه رزق كانت ملتزمة التزام شديد للفن و مبتقدمش و لا بتشارك غير فى أعمال مهمة وحياتها كلها كرستها للفن. كانت بالنسبة لممثلين كتير أم روحية، وكانوا بينادوها “ماما أمينة”.

رحلت أمينة رزق في 24 أغسطس 2003 عن عمر 93 سنة، بعد ما قدمت أكتر من 80 سنة من العطاء الفني. فضلت تمثل لحد آخر أيام حياتها، وسابت وراها إرث فني كبير ما يتنسيش.

قولولنا ايه اكتر دور بتحبوه ليها
وماتنسوش الايك والشير