*نبض*

تمشيك الشوارع..
وانت ما ماشيها
تناوشك ذكرياتك
وانت ما طاريها
تلاحقك اغنيات
بي حاضرها وماضيها
خايض فى بحور
سابقه الزمن بجريها
واقف فى شمِس
ولسه بتفتش فيها
يا هذي البلاد
والدارا والمابيها
ما بعدك بلاد ساكنانا نسكن فيها
ما بعدك ولاد
طالعين شموس في الجيهة
تارسين لي دروب
رَكْ انتصارنا عليها
واختاروا الوقوف
في الساحة من عاليها
يا هذي البلاد نارك منو البطفيها
غير مخلص وفي
وكُل العيون قاريها
ما باعك رخيص
للارصفة وماشيها
وما فضَّ المشاعر من عِشِق ماليها
جمرات بين اصابع
والقَلِب صاليها..
يا هذي البلاد
الرايحة راح تلقيها
يرجعلك صباح
في غنوة بتحبيها…!

#مكاشفي_ 2023