*من تشخيص الحرب لتمن إنهائها.. تعقيب على د. الشفيع خضر!.. وائل عبدالخالق مالك*

كتب د. الشفيع خضر في القدس العربي مقال بعنوان البديل العملي عن الحسم العسكري في السودان
وقدم فيه إطار يستاهل الاحترام
حزمة واحدة متكاملة فيها ضغط لوقف القتال وإغاثة عاجلة ومسار سياسي بقيادة مدنية
وكلو ماشي في أربع خطوات من الهدنة لغاية الترتيبات الأمنية
الإطار دا حا يتفق معاهو أي زول بيقرا الحرب بعيد عن معادلة يا ننتصر يا نستسلم
لكن قيمة أي رؤية للسلام ما بتتقاس بس بسلامة التشخيص
القيمة بتتقاس بقدرتها على الإجابة عن سؤال واحد
ليه جيش الدولة والتمرد المتحاربين يقبلوا بيها
ومنو البيلزمهم؟
وهنا بيبدأ الخلاف

د. الشفيع أصاب لمن رفض تفسير الحرب بسبب واحد ومجرد اختزالها في صراع جنرالين اللي بيتجاهل أزمة الدولة الممتدة من الاستقلال
واختزالها في الأزمة الوطنية بس بيتجاهل لحظة الانفجار ومن أشعل الفتيل
والجمع بين صراع السلطة وخلاف الدمج وفشل بناء الدولة والتنافس الإقليمي هو القراءة الأقرب للواقع
وأصاب كمان لمن قال شعار الحسم العسكري طلع من كونو تكتيك وبقى مشروع سياسي لإقصاء الخصوم
وأصاب تالت مرة لمن ربط وقف النار بوقف تدفق السلاح
لأنو ببساطة هدنة من غير ضبط للدعم وللإمداد الخارجي ما بتكون غير فرصة لكل طرف يرتب صفو ويرجع

لكن كمان في اشكالات من وجهة نظري المتواضعة
الإشكال الأول في افتراض انه المسار السياسي حصري للقوى المدنية
من حيث المبدأ ممكن يكون ده كلام صاح
لكن في الواقع القوى المدنية نفسها ضعيفة ومنقسمة
وبعضها مصطف فعلياً مع التمرد
وما عندها أدوات إلزام في الميدان
الحق المبدئي من غير آلية إنفاذ بيظل أمنية حلوة وبس
الاشكال التاني يتمثل في افتراض انه الأطراف حتقبل التسلسل المقترح
لكن الوقائع بتقول غير كدا
من جدة للرباعية كل المحاولات دي اقترحت خريطة طريق بتبدأ بهدنة إنسانية
ومرة الجيش يرفضها ومرة الدعم السريع يماطل رغم موافقته الكاذبة
يعني الناقص ما كان رؤية مدنية
الناقص هو توافق الحسابات العسكرية عند الطرفين والزول البشوف نفسو متقدم ما بيتنازل عشان الحجة الأخلاقية حلوة
كمان المقال بيتعامل مع الحرب كأنها نزاع بيتحل بحزمة متوازنة
وبيتغاضى عن حقيقة انه التفاوض الحقيقي بيجري على الجغرافيا والقوة قبل السياسة
ما على إعلان مبادئ
برضو القول بأن الخلاف حول الدمج سهل الحل لأنو قيادتي الجيش والدعم السريع طلعوا من رحم واحد فيه اختلاف
الحقيقة هي انه التشابه في النشأة ما بيخفف التنافس
بالعكس بيخليه اكثر حده
الدمج ما مسألة فنية وبس
هو في حقيقتو سؤال عن منو بيملك القرار والاقتصاد والشرعية
والأسئلة دي ما بتتحل بالقواسم المشتركة
وكمان العدالة الانتقالية موجودة في المقال كعنوان
لكن ما موجودة كشرط
بعد كل الانتهاكات الموثقة في الخرطوم والجزيرة وفي دارفور وكردفان
المجتمعات المتضررة ما حتقبل ترتيبات أمنية بتدمج المتهمين من غير مساءلة
والسلام البتجاوز الاستحقاق دا ما بيقعد ولا بيستمر
وأخيراً الطرح بينسى فاعلين محليين ما أقل أهمية بينسى الإدارات الأهلية والحركات المسلحة ومجتمعات الأطراف اللي دفعوا ثمن غالي
ديل ما جمهور بينتظر نتيجة المسار المدني
المفروض ديل أطراف في تحديد شروطو

البديل العملي ما محتاج شعارات جديدة
محتاج تلات إضافات تخلي الحزمة قابلة للتنفيذ
1. آلية إنفاذ قابلة للقياس تعمل رصد مستقل للخروقات وعقوبات محددة ومعلنة على من يخرق ومن يدعم ويمد بالسلاح كمان بما فيهم الدول الراعية للتمرد
2. توسيع قاعدة المسار المدني عشان تشمل الإدارات الأهلية والحركات المسلحة ومجتمعات الأطراف ما بس النخب المركزية
3. ربط الهدنة بالسلاح لأنه ما ممكن يكون في وقف إطلاق نار إنساني من غير التزام مقابل بوقف الإمداد وإلا الهدنة بتظل تكتيك حربي

في العموم د. الشفيع خضر محق في إن السلام الحقيقي ما بيتبنى على تسوية شكلية ولا على نصر متوهم
لكن الحقيقة الأقسى انه السلام في السودان ما حيجي لأنه الحجة المدنية أقنعت المتحاربين
السلام حيجي لأنه تكلفة الاستمرار في الحرب حتفوق تكلفة ايقافها
ولأنه في بيئة إقليمية ودولية مفروض تخلي دا واقع
ومهمة المثقف المدني والقوى المدنية ما بس يوصف الطريق
مهمتم يساهموا في صناعة التكلفة دي
وفي إيجاد من يتحمل المسؤولية في التمرد الظاهر منه والمستتر