في الحياة متسع …رغم كل شيئ
ولأرواح أرهقها التعب
(((( هدنة ))))
( فضل الله محمد )
طائر ( الفينيق ) وحارس (الأشواق )
( وقلنا ما ممكن تسافر ) …!!
وقالت كدا ( المطرة ) تاني شالت في ( مدني )
وجابت ( فضل الله محمد ) 🙌
وتطلّع السودان للجزيرة من جديد
والجزيرة لا تأتي إلا بالجديد …
قمِح …🌿 وسمِح 🥰
عن الرقة أحكي…وفي الرصانة أقول
وبإسم الموهبة أتحدث..
إنه ( فضل الله محمد ) المتبتل في محراب الجمال
والزاهد في دنيا الأضواء…الغارق في الدلال
هجّر القانون وكتب زاد الشجون ..
خسرنا حقوقي ومحامي وكسبنا درراً ومعاني …
( وما افتكرت الحظ يعاود عمري يورق من جديد ) …🎶
وقد( أزهرت ) يا ( فضل الله ) ……!!
و ( أورقت ) …!! 🌸
وتفتحت فينا همساً وسكون
وأهديتنا إياك قلماً وسعد ….عطراً ووعد ……!!!
وما هو باين فى العيون 😍
( أبو اللمين ) ألبسها لحناً ( خالد ) فكانت إحدى
( جداريات ) الغناء السوداني ….
علقناها على مداخل المدن ومتاهات الروح …وكنت تتعلم تجامل لو فؤادك مره جرب
ديل أولاد ( مدني ) …!!
والهوى الباعث الليالى العامرة بى زاد الشجون
لما يتلاقو بتكون منطقة إشعاع عالى …😱🚫
لازم تتغطى كويس وإلا ( الهوى ) بضربك ….!!
🎶
وما بنقاوم و كيف حنقدر ووين حنهرب منو وين …💕
( فضل الله ) قال
دنيا بي قربك يفرهد كل طائر يحيا فوقا
وجنة من بعدك بيذبُل كل مخضّر فيها ناضر
غايتو لو شفقان علينا ما أظنك يوم تسافر …..!!🎼
إنا لله ياخ…!!🙏
في أغنيه أصبحت ( الناطق الرسمي ) باسم كل ملتاع وحائر
نوى الرحيل ولا ساب ناسو القبيل …
🎻
ولو تسافر دون رضانا بنشقى نحن الدهر كلو
ما بنضوق فى الدنيا متعة وكل زول غيرك نملو
🎼
وبين المسافر والمودِع يتمثل ( فضل الله محمد ) في
التعبير عن خلجات النفوس وعذابات الروح …
ويتجلى ( الباشكاتب ) في نقل ( مباشر ) ….
وقلنا ما ممكن تسافر ..😥
فحلقا بنا بعيداً نتداعى في عوالمَ أخرى
حيث تتداخل الأحاسيس ويختلط الشعور في رحلة الوعد والدموع ونحن حالفين بالمشاعر 🙌
ولاتدري هل تفضّل ( فضل الله ) على ( محمد ) بنثرها
أم تلطّف ( أبو اللمين ) على ( الفضُل ) بنشرها …!؟؟🤔
إنها ( مُعادَلةُ ) الحب و ( ومَسأَلةُ ) الإختيار
وكُلٌّ بمقدار
( والدقيقة وإنت مافي مُرة ما بنقدر نطيقا ) …
فشكل مع ( محمد الأمين ) ثنائيه مبدعة قدمت هذه الأغنيات الخالدة
ولما أصدر ( الجريدة ) كتب …
أسمعي وطاوعيني مرة
أيوة ما تخليك عنيدة
عايز أقولك
ولا سيبك أقرى أحسن فى الجريدة
( شفناها شوف يا فضل الله ) 😍
ولازال الشعب السوداني يقرأ ويتذوق ويستمتع ويعيش
مع الجريدة ….
ولازالت توزع ……..رغم أنف ال ( TikTok ) و ( Inesta )
وحتى الذكاء الإصطناعي
فضل الله قال ..
عايز أقولك…كيف أقولك….ما بقولك ..مُش مخير 🎼…!!!
( يازول مخيّر ….!!
أها….
والغريبة إنو كتب ( الجريدة ) ( صحيفة ) و( أغنية ) وفي الإتنين تفوق ….!!
شاعر ( مسموع ) وصحفي ( مطبوع )
جمع بين الخبر والحقيقة …المفردة والموسيقى
فمشى وتبختر ….
بخطوات أنيقة وأحرف رقيقة
كتب فأبهر..
( والغريبة الساعة جنبك تبدو أقصر من دقيقة ) …
( وأبو اللمين ممكن يلحن ( الكلمات المتقاطعه ) خلي الجريده )
ثنائيته معه هي إقتران الشمس والقمر
وحتى خروجه عنها كان ساطعاً ومنير
فالكواكب تدور حول نفسِها والشمس …
حيث التقى ( عركي ) دون ميعاد في ( السابحة ) بتوقيت ( غرينتش )
وبوعِدِك يا ذاتي يا أقرَب قريبَة 🎶
أغنيه بتشبه ( عركي ) وتلامس إحساسنا …
فضل الله كتبا بالشعاع والنور و ( القديس ) غناها على ضوء القمر وفي حضرة البدور
والليله أهديك دبلة الحب والخطوبة 💍💕
و ( محمد الأمين ) هو اللحّن هذه الأغنية ….!!
عربون محبة وتهادي كبار …
فتخيل ..!!!
( أبو اللمين وفضل الله محمد وأبو عركي البخيت )
( فطاحلة مدني ) وأسياد الشي كلو ..
وأي حاجة تزعلك حالاً أسيبا …
تنقل بين القانون والصحافة والشعر والأدب
في رشاقة يُحسد عليها وسلاسة يعرفها الراسخون
يستحي الأضواء والبريق حال الكبار ….
وينتقي من الكلِم الرقيق فيصنع حباً وجمال
إن تعثر أردف …وإذ تدفقَ أسرف
وأبو اللمين بعرِف من وين بجي …
ومن أين يؤكل ( الحرف ) 🎶 …!!
صادف ( أكتوبر ) وهو طالب بكلية القانون بجامعة الخرطوم
فتغزل فيه حتى عرف بشاعر ( الأكتوبربات ) ويا صحو الشعب الجبار
وكان دائماً مع ( محمد الامين )،وعلى الموعد …
وتصور روعة الموعد …
🎶 🎶
وﺃﻃﺎﻭﻋﻚ ﻳﺎ إرادة ﺍﻟﺤﺐ
ﻭﺃﺳﻠﻢ ﻟﻴﻚ ﻣﺎ ﻋﻨﺪﻯ
ﺃﻓﻀﻰ ﻇﺮﻭﻓﻰ ﻭﺃﺗﻔﺮﻍ
ﻭﺃﺑﺎﺩﺭ ﺑﻜﺮﺓ ﻓﻰ ﻭ ﻋﺪﻯ
أبو اللمين جعل من الموعد ( قصة ) ومن اللحظة ( رقصة ) 💃
في أغنيه محلّقة …ولحن هزّاز
لما تسمعا بتنسى نفسك وتنتقل الي براحات أخرى ..
وتتذكر الناس العُزاز
ﻭﻳﺎ ﻳﻮﻡ ﺑﻜﺮﺓ ﻣﺎ ﺗﺴﺮﻉ
ﺗﺨﻔﻒ ﻟﻰ ﻧﺎﺭ ﻭﺟﺪﻯ
يعني ( محمد الأمين وفضل الله محمد ) ….
تتوقع شنو ؟؟
لازم سقف التوقعات يكون كبير ولابد أن تهيئ نفسك الي مغادرة بتأشيرة ( زهور ) ومراسم بحفاوة انتظار
وﻭﺩﺍﻋﺎً ﻳﺎ ﻇﻼﻡ ﺍﻟﻬﻢ
ﻋﻠﻰ ﺃﺑﻮﺍﺑﻨﺎ ﻣﺎ ﺗﻌﺘﺐ
ﻭﻣﺮﺣﺐ ﻳﺎ ﺻﺒﺎﺡ ﺍﻟﺤﺐ تعال
ﻣﺎ ﺗﺒﺘﻌﺪ …💕
غازل ( الجزيرة ) في إحدى ( طلعاته ) ….
غناها ( محمد مسكين ) …..
فصارت ( السلام الجمهوري ) للناس والأرض والطين
وﻣﻦ أرض المحنّة
ﻣﻦ ﻗﻠﺐ ﺍﻟﺠﺰﻳﺮﺓ
ﺑﺮﺳﻞ ﻟﻲ ﺍﻟﻤﺴﺎﻓﺮ
أشواقي ﺍﻟﻜﺘﻴﺮﺓ ….
و ( محمد مسكين ) ….مسكين في أي حاجه إلا ( الغُنا )
( وبرضو مدني )
كلمات على بساطتها لكنها جاءت صادقة ومعبّرة ومتدفقة
لما يسمعوها ناس ( الجزيرة ) ينتقلوا إلى هناك صورة وصوت ….!!
ﻭﻻ أسيبا ﻣﺪﻧﻲ
وأجي أسكن ﺣﺪﺍﻛﺎ 🥰
وتغنى كما غنى ( الخليل ) ..
ومالو أعياهو النضال بدني … وروحي ليه مشتهية
ودمدني 😍
وبين ( خليل فرح ) و( فضل الله محمد ) يتمدد السودان
بعشقه وروحة …إحساسه والكيان …
والباشكاتب في النُص ( ديلفري ) الأشواق و ( رمانة ) الميزان
يتقاسمنا الفرح وكيف بدون حبك نكون
عاود ( فضل الله محمد ) كل عليل ..وأرسل مواساته
لكل من غشاه عارض وأقعده دليل
غريب ( فضل الله محمد ) ..!! ؟؟🤔
غنى للمسافر فتقمصّنا والجروح
وانشد لمُعطوب فتحدث باسمنا والروح
فكانت باقة زهور نحملها كلما اختبر التعب قريباً وكلما زار الوجد حبيب …
( ومن بعد فرقتنا ديك مين كان بيفتكرك تعود) 🙏
استخدم الدفع الرباعي فتمخض (حب )
وأربعة سنين ﻋﺎﺷﻬﻢ ﺍﻟﺤﺐ
ﺍﻟﻠﻴﻠﻪ ﻋﻴﺪ ﻣﻴﻼﺩﻫﻢ ﻳﺎﻗﻠﺐ
ﻭﺟﺪّنا ﺍﻟﺤﺎﺭ ..ﺯﻳﻨﺔ ﺍﻟﺪﺍﺭ
إبننا ﺍﻟﺒﺎﺭ إبننا ( ﺍﻟﺤﺐ) 💕
هكذا كان ( فضل الله محمد )،نسمةً سودانيةً خالصة
وومضةً إنسانية ناصعة …زهراً وعبير
في يده قلم وفرشاة ..يكتب الأماني ويرسم الأشواق
ولسه ما صدقنا إنك بي جلالك جيتنا زاير
السفر ملحوق ولازم إنتا تجبُر بالخواطر
( لقد جبرت بي خاطرنا كلنا )
مضيت وتركت سحراً …..!!
( كثيرُ جمال …وبعض أمنيات )
وقلنا ما ممكن تسافر 🌹
صحي يا ( فضل الله ) ..!!؟😍
