اليوم داير اتكلم عن موضوع مهم جدا جدا بحكم عملنا في مستشفيات الاطفال، بيجونا أطفال وأهلهم وهم بيعانو معاناة شديدة بي سبب أمراض السبب الأساسي فيها زواج الاقارب، لانو بيزيد احتمالية الأمراض الوراثية
*هنا ممكن واحد يقول انو الاتنين (الزوج والزوجة) ما عندنا اي مرض ولا اعراض ولا حاجة!!
الإجابة انو في الأمراض الوراثية دي في حاجة اسمها جينات متنحية، يعني بكون الام والاب عندهم جينات المرض المعين لأنهم جايين من أصل واحد، لكن لي درجة ما تظهر المرض لكن لما يجيبو ابناء يشيلو جينات منهم الاتنين ويظهر المرض في الاطفال ويكونو الضحية.
نأخد أمثلة :-
أطفال يجو كل شهر المستشفى عشان ياخدو دم
اطفال يحتاجو لتغيير دم بصورة منتظمة
أطفال بيعانو من إعاقات حركية وذهنية دائمة
أطفال بيعانو من تشوهات في القلب والأعضاء الحساسة
أطفال بيعانو من إعاقات حركية دائمة
أطفال بيعانو من ضعف المناعة وأمراض استقلابية
ومن هنا تبدأ المعاناة *
وجود بصورة مستمرة في المستشفيات، نقل دم متكرر مع المخاطر المرتبطة به، التهابات متكررة واستخدام للمضادات الحيوية مع خطر على الحياة بسبب ضعف المناعة، تشوهات حركية وعيوب خلقية في اعضاء حساسة مثل القلب، والجهاز العصبي، تأخر في النمو والتطور وبعض انواع الصرع
والقائمة تطول والمعاناة تزيد، وحقيقة ما نشاهده من معاناتهم يدمي العيون، معاناة صحية للأطفال ومعاناة نفسية ومادية ومعنوية وجسدية للأهل.
وللأسف معظم هذه الأمراض لايوجد علاج جذري لها
** نجي لخلاصة الموضوع لابد من إعادة النظر في زواج الاقارب ونغير مفهوم انو البت لي ولد عمها او ولد خالها
ويتحملوا المعاناة الطويلة والمريرة هم وأبنائهم.
*ممكن زول يقول انا بعرف ناس كتيرين متزوجين اقاربهم وما عندهم اي أمراض في أطفالهم!
الإجابة انو زواج الاقارب ما بيعني حتمية الإصابة ولكن يزيد احتمالية الاصابة، طيب هل نتحمل معاناة احتمالات غير مضمونة وتبعاتها
*** طيب مافي حل للموضوع دة؟؟؟
الحل اذا كان ولابد من زواج الاقارب لازم يتعمل فحص للجينات عشان يتم التأكد من عدم وجود جين لمرض معين، والاستشارة الوراثية عند وجود مرض معين لمعرفة نسبة حدوث خصوصا في العائلات العندهم أمراض وراثية معينة
